તૃણમૂલ કોંગ્રેસ (TMC)ના વડા મમતા બેનર્જીના નાના ભાઈ બાબુન બેનર્જીએ પશ્ચિમ બંગાળની હાવડા લોકસભા બેઠક પરથી પ્રસૂન બેનર્જીને ફરીથી પાર્ટીના ઉમેદવાર બનાવવા પર નારાજગી વ્યક્ત કરી છે. તેમણે ભારતીય જનતા પાર્ટી (BJP)માં જોડાવાની અટકળોને નકારી કાઢી હતી, પરંતુ કહ્યું હતું કે તેઓ હાવડા બેઠક પરથી અપક્ષ તરીકે લોકસભાની ચૂંટણી લડવાનું વિચારી રહ્યા છે. બાબુન બેનર્જી હાલ દિલ્હીમાં છે.
આ પછી મમતા બેનર્જીએ પણ પોતાના નાના ભાઈ બાબુન સાથેના તમામ સંબંધો ખતમ કરવાની જાહેરાત કરી હતી. પશ્ચિમ બંગાળના મુખ્યમંત્રી મમતા બેનર્જીએ કહ્યું કે, હું અને મારો પરિવાર બાબુન બેનર્જી સાથેના તમામ સંબંધોનો અંત આણીએ છીએ.
સવાલો ઉઠાવતા તેમણે કહ્યું કે હાવડા લોકસભા સીટ માટે ઉમેદવારની પસંદગીથી હું ખુશ નથી. પ્રસુન બેનર્જી યોગ્ય પસંદગી નથી. ઘણા વધુ સક્ષમ ઉમેદવારો હતા જેમની અવગણના કરવામાં આવી હતી.” તેમણે કહ્યું, ”પ્રસૂને મારી સાથે જે અપમાન કર્યું તે હું ક્યારેય ભૂલી શકતો નથી.” ભૂતપૂર્વ ફૂટબોલ ખેલાડી પ્રસૂન બેનર્જી તૃણમૂલ કોંગ્રેસ તરફથી બીજી વખત લોકસભામાં હાવડા બેઠકનું પ્રતિનિધિત્વ કરે છે. અને તેમને ત્રીજી વખત પણ ઉમેદવાર બનાવવામાં આવ્યા છે.
મમતા બેનર્જીના નાના ભાઈ બાબુન બેનર્જીએ કહ્યું કે તે હાવડાના રજિસ્ટર્ડ મતદાર છે. તેમણે કહ્યું, “હું જાણું છું કે દીદી (મમતા બેનર્જી) મારી સાથે સહમત નહીં થાય. પરંતુ જો જરૂર પડશે તો હું હાવડા લોકસભા સીટ પરથી અપક્ષ ઉમેદવાર તરીકે ચૂંટણી લડીશ.” તેમણે એમ પણ કહ્યું કે જ્યાં સુધી મમતા છે ત્યાં સુધી હું ક્યારેય પાર્ટી છોડીશ નહીં કે કોઈ રાજકીય પક્ષમાં જોડાઈશ નહીં. હા, એ વાત સાચી છે કે હું રમતગમત સાથે જોડાયેલો છું અને ભાજપના ઘણા નેતાઓને પણ ઓળખું છું જેઓ રમતગમત સાથે જોડાયેલા છે.
તમને જણાવી દઈએ કે તૃણમૂલ કોંગ્રેસ આગામી લોકસભા ચૂંટણી માટે એકલા હાથે લડી રહી છે. તાજેતરમાં, મમતા બેનર્જીએ બંગાળની તમામ 42 બેઠકો માટે તેમના ઉમેદવારોની જાહેરાત કરી હતી. મમતાએ પૂર્વ ક્રિકેટર યુસુફ પઠાણને બહેરામપુર લોકસભા બેઠક પરથી કોંગ્રેસના લોકસભા નેતા અધીર રંજન ચૌધરી સામે મેદાનમાં ઉતાર્યા છે. બહેરામપુર સીટ કોંગ્રેસ અને અધીર રંજન ચૌધરીનો ગઢ માનવામાં આવે છે. આ સિવાય મહુઆ મોઇત્રાને પણ કૃષ્ણનગર લોકસભા સીટ પરથી ટિકિટ આપવામાં આવી છે.
